كريتوس بالطبيعة غني عن التعريف.. مفيش Gamer مايعرفوش، حتى كمان اللي ملوش في الالعاب يعرف شكله و يقدر يميزه.

كل صفات كريتوس شوفناها على مدار سنين.. من اول اصدار للعبة سنة 2005 و لحد 2018.. و شوفنا ازاي هو عنيف و قوي و مفيش حد او حاجة تقدر تقف في طريقه لتحقيق هدفه، لكن الصفات دي خلتنا نسأل سؤال.. هل شخصية زي دي تستاهل الحب والتعاطف؟

السؤال دة اجابته اكيد مختلفة من شخص للتاني.. و ممكن تجاوب عليه بنفسك بعد ما تشوف الاسباب اللي ممكن تخليك تكره كريتوس. *خلي بالك.. في حرق!*

-الخوف من الهزيمة

الطبيعي كونك محارب اسبرطي تكون رافض مبدأ الهزيمة و دايما بتدور على النصر.. لكن هل فعلا الهزيمة تخليك تقرر تغيّر مصيرك و مصير عيلتك و جيشك بالكامل لمجرد انك تنتصر؟ دة اللي كريتوس عمله في الجزء الاول من اللعبة في مواجهة البربر لما طلب مساعد Ares عشان ينجيه من الموت -اللي بالفعل كريتوس هرب منه كذا مرة بعد كدة- و دة سبب موت عيلته على ايديه عشان يكون هو السبب الاوحد في موتهم.

-الكراهية المفرطة

الانتقام من اللي كان سبب في موت عيلتك هو شئ مبرر -دة على افتراض ان كريتوس مش هو السبب يعني- لكن عدم التفكير في اي شخص تاني ممكن يتظلم و يدفع تمن الانتقام دة هو شئ ملوش اي تبرير ولا اي دوافع. على سبيل المثال القتال بين كريتوس و بوسايدن في الجزء التالت من اللعبة.. كان في كم كبير جدا من الوحشية الغير مبررة في قضاءك على خصمك، و نفس الوحشية في القتال قدام هيليوس في نفس الجزء من اللعبة.

و المثال الاقوى.. مواجهة شخص زي "هيفستس" و هو معلوم للكل انه غير قادر على اداء اي خطر في رحلة كريتوس لتحقيق هدفه و كان ممكن بكل بساطة الهروب منه، مع الاخذ في الاعتبار كم الاحباط و الذل اللي كان بيعيشه "هيفستس" و دة اللي خلاه يائس و قرر يقتل كريتوس. 

-عدم الرحمة

القتالات اللي قولنا عليها دي كانت قدام اعداء اقويا و قدروا انهم يقفوا قدام كريتوس.. فـ طبيعي انه مايكنش رحيم بيهم.. لكن خلينا نضرب مثال بخادمة بوسايدن اللي كريتوس ضحى بيها لمجرد انه "يفتح باب؟"

او في الجزء الاول من اللعبة لما ضحى بواحد من المسجونين و كان مبرره "ان الالهة طالبين اضحية".. ناس بريئة فقدت حياتها عشان كريتوس يكمل حياته بكل سلاسة و اعتيادية.

-التجرّد من الشرف

كل الكوارث اللي سببها كريتوس كانت كفيلة بإنها تمحي ارثه و شرفه للابد، و ماتسيبش اي مبرر ممكن ندعمه او تخلينا نقف جنب كريتوس.

في الجزء التاني في اللعبة في Palace of the Fates بيقابل كريتوس واحد من كهنة المعبد المترجمين.. و في وسط اجباره للكاهن على ترجمة نص معين بالاكراه بيقوله "Die with Honor".. فعلا؟ فين الشرف انك بتجبر الشخص الاعزل انه يعمل اللي انت عايزه و بعدها تنهي حياته بمنتهى البساطة؟ 

-بلا عقل

مواقف كتيرة بين كريتوس والشخصيات اللي قابلهم كانت ممكن تخلص و تتحل بالسياسة و العقل.. حواره مع Oracle المعبد في الجزء الاول مثلا.. او حواراته مع "أثينا" او "هيفستس".. لكن كريتوس دايما بيلجأ للحل الوحيد و اللي معندوش غيره في حل المشكلات.. بالظبط! العنف و القتل. لأنه ببساطة معندوش حاجة تانية بارع فيها غير دة.

طبعا احنا شوفنا ازاي كريتوس اتغير في الجزء الاخير من اللعبة و اللي كان اعلان لبداية جديدة لكريتوس جديد.. لكن هل ممكن مع الاجزاء الجديدة من اللعبة نشوف كريتوس القديم بيرجع من تاني؟