حقيقة احتمالية أنفصال شركة EA Games عن FIFA

أعتقد انه فى الوقت الحالى مافيش اى شخص مهتم بالعاب الفيديو, ميعرفش لعبه FIFA حتى لو مكنتش العاب الرياضه من اهتماماتك, أو عن حقيقه وجود احد أهم العناوين المعروفه عند الكل وهو Ultimate Team اللى ممكن نعتبره ماكينه لطبع الفلوس لشركة EA Games.

وبخلاف مدى ربحيه مجمل سلسلة العاب FIFA عند الشركه, ولكن من الممكن اعتبار اللعبه دى احد اكثر الالعاب شعبيه, بصوره مستمره طوال ال20 سنه الماضيه. وماعتقدش ان فيه شك ان لعبه FIFA كان ليها التاثير الاكبر على اتجاهات شركه EA فى مجمل العابها, ومش بس كده بل يمكن جدا تصور تاثير تلك اللعبه بوجه عام على صناعه العاب الفيديو سواء بالسلب او بالايجاب.

وخلال الاسبوع الماضى كان من اهم الاحداث المهيمنه على اخبار عالم صناعه العاب الفيديو, كان احتماليه انفصال شركة EA Games و منظمة ال FIFA نفسها, ليه نصيب الاسد, وخلال السطور القادمه خلونا نتكلم عن معنى ده ايه؟ وهل ده معناه تغير كبير للعبه اللى بيتم اصدارها بصورة سنويه من EA ؟ وهل فيه اى طرف هيكون متضرر بصوره مباشره من التغير الغير متوقع ده ؟ ومين اللى نعتقد انه مرشح قوى انه يستكمل سلسلة FIFA كعنوان من بعد شركه EA Games ؟

ممكن ان حقيقه ربحيه شركه EA Games من نظام واحد فقط وهو ال Ultimate Team تجاوز المليار دولار بصوره سنويه, منذ العام 2018 او مع الاصح ده ما تم الاعلان عنه بصوره رسميه من الشركه ( وما خفى كان اعظم ), بالاضافه ان بسبب المجهود الخاص بمطورى سلسلة العاب FIFA من شركه EA Games والفرع الرياضى للشركه EA Sports, ممكن اعتبار ان اللعبه دى هى اللعبه الوحيده اللى بتقدم تجربه شبيهه بالواقع لحياه كره القدم, وهى بطبيعه الحال الرياضه رقم 1 عالميا, وصعب جدا جدا جدا تقييم او احصاء عدد متابعين رياضه كره القدم بصوره شبه واقعيه, وده ممكن يكونلك صوره عن المدى اللى وصلتله شعبيه اللعبه بصوره عالميه.

ولاسباب تانيه غير اللى زكرناها بعاليه وصل تاثير اللعبه الى ابعاد حقا وصدقا لم تكون بالحسبان حتى لمطورى اللعبه فى تسعينات القرن الماضى , بالاضافه انها مرتبطه بعنوان FIFA وهى المنظمه الام لرياضه كرة القدم اللى كان بيضيف طابع الرسميه للعبه المطوره من EA بمعنى ان, كان دوما فى صوره فى اذهان عشاق اللعبه بصوره غير مباشره انها اللعبه الرسميه لرياضه كرة القدم.

وده كان بيزيد كل سنه خاصتا لو كنت من متابعين الدورى الانجليزى او الاسبانى او الايطالى بأنك بتشوف شعار EA Sports بصوره مستمره حتى على زى الحكام او على البانرات الاعلانيه حولين ارض ملعب المباراه نفسها, فخلال السنوات الماضيه كل من الكيانين سواء EA Games او منظمه ال FIFA نشاء بينهم علاقه منفعه متبادله, فيها استفاده مباشره للطرفين.

بالنسبه لشركه EA أكيد استفادو جدا من الانتشار الغير مسبوق فى عالم صناعه العاب الفيديو حتى يومنا هذا, واكيد كان ليه اثر مباشر على مبيعات اللعبه على كل المنصات, غير الشعبيه والربحيه الطاغيه لنظام زى ال Ultimate Team ( ماكينه طبع الفلوس للشركه ), وبالنسبه لمنظمه FIFA اللى استفادت ماديا من اللى ممكن نسميه تأجير عنوانهم لشركه العاب, بالاضافه الى الانتشار المستمر طوال اجيال لرياضه كره القدم وده بيكون اهم كتيييييير جدا عند معظم الكيانات العالميه.

حماقه ام نظام رأسمالى بحت

خلال الخمسه سنوات الماضيه, كان بيتم تردد اخبار بصوره مستمره عن ان منظمه ال FIFA عاوزه كل سنه قبل الاعلان رسميا عن الجزء الجديد من اللعبه اللى غالبا ما بيكون خلال شهر يونيو من كل سنه ( ممكن تظبط ساعتك عليه على فكره ), تزيد قيمه ايجار العلامه التجاريه, ولكن شركه EA اللى ممكن نطلق عليها لقب ملوك التفاوض فى عالم صناعه العاب الفيديو, كانو بيوصلو لحلول بديله مناسبه للطرفين.

ولكن نعتقد ان الضغط من طرف منظمه FIFA المرادى اكبر شويه من قدرات شركه EA Games على التفاوض اللى بيتولى منصب الرئيس التنفيذى ليها Andrew Wilson اللى صرح رسميا خلال احد المقابلات معه عن مستقبل العاب السلسله والاهم احتماليه تغيير عنوان اللعبه من FIFA يرفقها سنه الاصدار( مثال FIFA22 ), الى عنوان اخر كما اشار الانفصال تماما عن منظمه FIFA, وهنرجع للنقطه دى فى وقت لاحق.

ولكن من قبل التحدث على وجهة نظر كل كيان ( شركة EA Games و منظمة ال FIFA ) لازم نوضح نقطة, ان فى ظل النظام الرأسمالى الحديث, الكيانين معاهم حق والموضوع فى الحاله دى بيتحدد بمعدل المخاطر على كل كيان فى حاله الانفصال الفعلى ان تم.

بالنسبه لشركة EA Games وجهة نظرها انهم اللى بيطورو فى اللعبه كل سنه وبيصرفو بالكامل على عمليه التطوير بالاضافه الى قيام الشركه بالكامل بالعمليه التسويقيه للعبه دون اى تدخل من منظمة FIFA وان سبب الانتشار المستمر لرياضه كره القدم خاصتا للفئه العمريه من 3 الى 10 سنوات, لا يمكن انكار حقيقة ان اللعبه فعلا ممكن نعتبرها سبب ليه.

بالنسبة لمنظمة FIFA فوجهة نظرهم ان الشعبية اللى وصلت ليها اللعبه وصفة الرسميه فى مختلف اصداراتها,  هما السبب فيه وان الاتفاق السابق مكنش واخد فى الحسبان ربحية ال Ultimate Team بل الربح المباشر فقط من بيع نسخ اللعبه, والمنظمه فى الوضع الجديد ده بتطالب بنسبتها فى الارباح بان الاتفاق يتعدل.

فى ظل الاتفاق الجديد منظمة الFIFA بتطالب بمبلغ 2.5 مليار دولار كل أربعه سنوات وهناك رغبه من المنظمة بتحديد الفرص الربحيه لشركة EA Games فى بعض الفرص التسويقيه خارج نطاق العاب الفيديو يعنى, مع السلامه لوجو EA Sport من هنا ورايح فى كل شبر فى الدورى الانجليزى مثلا, وده طبيعى يكون شيى مش مقبول من قبل شركه EA Games, لان ده معناه حد فى الانتشار وكمان لان المبلغ ده معناه 625 مليون دولار مصاريف سنويه على تطوير اللعبه, وطبيعى جدا ان المبلغ ده يكون مبالغ فيه حتى بالمقارنه بالارباح السنويه لل Ultimate Team وبيحد جدا من قابليه شركة EA Games بعمل تطوير للسلسلة ما بين كل جزء للتانى, وخلى فى بالك انها لعبه بيتم اصدارها بصوره سنوية وزيها زى اى منتج فى العالم بيكون فيه حاجه اسمها دورة رأس المال يعنى ال 625 مليون دولار, من المتوقع انها ترجع امتى ؟

طيب فى حاله الانفصال بين EA Games و ال FIFA ( منظمة ال FIFA ), من الطبيعى اتجاه المنظمة لشركة تانيه ممكن تقدر تدفع ال 2.5 مليار دولار كل 4 سنين وحاليا عدد الشركات اللى تقدر تدفع المبلغ ده مقدما مش كتير, ممكن Activision او 2K , واللى بيفكر فى شركه Konami اعتقد فعلا ان الوضع مش متوافق مع Konami برضه, واللى بيدى نسبه عاليه من المخاطر على منظمة ال FIFA ان عمليه تطوير العاب الفيديو فعلا بتاخد وقت مش قصير اطلاقا.

 يعنى عقبال ما يكون فى منافس جديد فى السوق بعنوان FIFA, العمليه دى ممكن تاخد مابين سنتين الى 3 سنوات على افضل صوره, فى حالة ان شركة EA Games بتمتلك حاليا منتج جاهز , ليه شعبيه , منظم , متعارف على آليات ال Gameplay ليه فى حاله ان الاشاعات كانت صح اللعبه الجديده من المفترض تسميتها ب EA Football FC, وبحمله تسويقيه مناسبه مع الحفاظ على الشكل المتعارف عليه فى تقديم اللعبه زى تصميم بوستر و قوائم اللعبه فلا اعتقد انها هتكون مشكله فى تعريف ان EA Football FC هى لعبه FIFA سابقا, خاصتا عند ال Hard core fan للعبه نفسها مش الاسم.

اما بالنسبه لاحتمالية خسارة EA Games لصفة الرسمية اللى بتميز العابها فى الوقت الحالى بسبب اسباب كتير, اهمها أستخدام اسماء الملاعب و الاعبين و النوادى الحقيقية, ده برضه هيكون فى امان مع شركة EA Games لان الشركة موقعة فوق ال 300 اتفاقية حصريه مع عدد من الوكالات المحليه داخل كل بلد فيها دورى و منظمات اللى بترخص استخدام الصور او الاشكال الحقيقية للاعبين, ومنظمة FIFA فى الحاله دى فى حاله انهم اتجهو لشركة جديده, المنتج اللى هيكون اسمة FIFA23 مثلا هيكون مشابه جدا للعبة e Football المملوكة من قبل شركة Konami وده بيخلى من الصعب جدا ان Konami تتعاقد مع منظمة FIFA لان فى الحاله دى هتكون تكاليف كبيره من غير ميكون مقابلها طابع الرسميه اللى بتتمتع بيه شركة EA Games.

زى ما قلنا من قبل كده ان مفيش طرف صح وطرف غلط , ولكن بكل حياديه منظمة FIFA ممكن تكون فى وضع صعب فعلا فى حالة ان الانفصال مع EA Games حصل, خاصتا ان EA مع الرغم من انها برضه هتعانى بس بالصورة اللى هتكون معاناة FIFA عليه لانها هتكون معاها الاسم من غير المميزات اللى اعتاد عليها اللى اتعود على الاسم بالاضافة ان المنتج ده قدامة فتره سنتين او اكتر عقبال ما يشوف النور, فى حاله ان منتج EA Games هيكون متوفر السنه اللى جيه.