لعبه Battlefield 2042 هل تستحق التجربه ؟

تم اصدار واحدة من اهم العاب الShooter يوم 12 نوفمبر اللى فات, وبقالى فترة من يوم اصدارها كا early access لمشتركى EA Play Pro وهى تعتبر السبب الاول ان مواعيد نومى جالها نوع من انواع الشلل الرعاش, طبعا بتكلم عن لعبة Battlefield 2042 اللى هانتكلم اليوم عنها, وعن نظم اللعب المتوفره فيها بالتفصيل, وعن هل اللعبه فعلا بتعانى من مشاكل تقنيه زى ما فيه كتير بيقولو ولا فيه مبالغه حقيقيه فى الموضوع ده ؟ والاهم من كل ده, وطبعا من وجهة نظرنا الشخصيه هل اللعبه بالصورة الحاليه ليها تستحق الشراء ؟

من المعلوم ان لعبة Battlefield 2042 هى الجزء الجديد من سلسلة الالعاب اللى ممكن نوصفها بأنها اقرب ما يكون لمحاكى شبه واقعى للحروب فى التاريخ المعاصر, ومن المعتاد من سلسلة الالعاب دى انها الوحيده اللى بيعرف استوديو تطويرها DICE انه يوزن بين محاكاه الواقع وبين احساسك انك بتلعب Video Game فى المقام الاول, واول حاجة تقريبا هتلاحظها فى Battlefield 2042 هو غالبا Scale الخرايط المتوفرة حاليا والتصميم الشبه ممتاز ليها فى اللعبة لان فى الجزء ده, الخرايط تم تصميمها علشان تستوعب 128 لاعب فى نفس الوقت وده بجد رقم كبير جدا وممكن نعتبره نقله فى العاب الTeam Based Multiplayer Shooters

شخصيا, وقبل ما اقوم بتجربة Battlefield 2042 شخصيا, كان ليا تحفظ على خلو الجزء ده من نظام اللعب الفردى او single player campaign خاصتا ان اللعبة دى Full priced game يعنى 60 دولار للنسخه العاديه ولو هتلعبها على الPLayStation 5 سعرها 70 دولار ونسخة ال ultimate editionمنها ب 109.99 دولار وكان عندى اعتقاد انها كمنتج ممكن نعتبره منتج منقوص ومايستهلش السعر ده.

بجد ومن غير ما اكون ببالغ , كل ده اتغير 180 درجه يوم 12 فبراير لانى بجد اتفاجئت من كم المحتوى المتوفر فى اللعبه دى Day one وخلال السطور اللى جيه هانتكلم عن كل نظام متواجد فى Battlefield 2042 ومميزات وعيوب كل واحد منهم وايه اللى اعتقد ممكن يتم اضافته فى وقت لاحق للعبه ممكن يحسن من التجربه بوجه عام.

اولا : ALL-OUT WARFARE

النظام ده بيدعم 128 لاعب فى نفس الوقت فقط على ال Xbox Series X|S, PlayStation 5, and PC يعنى اجهزة الجيل الجديد فقط و طبعا اجهزة الحاسب الشخصى PC وده تقريبا النظام المفضل لى بصورة شخصيه, لانه ببساطه شديده جدا, بيحسسك انك فى ساحة معركه بجد, جنود مشاه كل واحد بيحاول انه يتحرك فى مجموعات منظمه ( حتى ولو من غير قصد ) كل واحد منهم بيكون عارف دورة ايه فى الحرب ولما تلقى نظرة على مستوى نظرك بتلاحظ دبابات ومركبات حربيه بتتحرك فى تشكيلات ( لو معاك فريق فاهم طبعا ) بتتحرك فى المقدمة وبتحاول توفر غطاء للجنود اللى وراهم وفى نفس الوقت بتتصدى لدبابات وعربات العدو, وفوق كل ده سرب من طيارات الهيلكوبتر غالبا بيكون عليها Sniper بيصطاد جنود الاعداء من فوق ( برضه لو معاك فريق فاهم ) وفوق الهيلكوبتر بتلاحظ طيارات SU-57 Elon Jet و F-35E Panther Jet فى اشتباك ملحمى كما لو كنت فى صاله سينما بتتفرح على الجزء الجديد من فيلم Top Gun بطوله Tom Cruise.

بجد من الصعب جدا انى احاول حتى وصف روعة المشهد اللى بيكون قدامك فى اى لحظة فى نظام ALL-OUT WARFARE وفعلا اعتقد ان مافيش مراجع العاب فيديو او اى مقال ممكن ينكتب او حتى فيديو عشوائى هاتشوفو على ال YouTube ممكن يوصلك كم التفاصيل المبهرة جدا جدا فى الصورة اللى بتكون قدامك, وفعلا دى تجربه لازم تعيشها علشان تعرف ايه اللى بحاول باستماته انى اوصلهولك ( كتبت الجزء ده اربعه مرات لغايه دلوقتى على فكرة ).

ولكن بما اننا بنتكلم عن لعبة فيديو فأكيد فيه سلبيات فى النظام ده اولهم هو معدل الاداء لان من عدد لابأس منه اطلاقا من اللى بيلعبو اللعبه حاليا على الPC واضح ان فيه مشاكل فى  ال optimization خاصتا مع كروت الشاشه الHigh End زى الRTX 3060 وانتا طالع لغاية الRTX 3090 لان فيه اوقات بتلاقى تجربتك للعبه خاصتا مع النظام ده مع تواجد 128 لاعب فى نفس الوقت, ان عدد الفريمات نط حرفيا من 90 فريم او 80 فريم فى الثانيه الى 55 او 60 فريم فى الثانيه بدون اى مقدمات او كميه Effects تستدعى هبوط فى الفريمات وفى اوقات كمان بيقلو الى 40 فريم, ولكن مع كروت الLow to Mid-range الوضع مختلف بصورة غريبه, مثلا انا بلعب اللعبة على الGaming Laptop الخاص بى بكارت شاشه متواضع GTX 1660 TI ومستوى اداء اللعبه عندى مستقر نوعا ما بين 60 فريم الى 55 فريم فى الثانيه تقريبا طول الوقت, ما عدا اول دقائق اى مباراه بيكون معدل الاداء بين 35 فريم و 28 فريم لثوانى وبعد كده اللعبه بتكون طبيعيه وسلسله جدا.

وكمان من تجربتى ان معدل اداء اللعبه على الUltra-High شبه معدل ادائها على الLow بمعنى ان فيه حاجه مش مظبوطه على الاقل حاليا فى Settings اللعبه, وغالبا كل ده هايتعدل لما تنزل تحديثات لكروت Nvidia او AMD وبرضه مع الDay One Patch للعبه نفسها وقت اصدارها الرسمى 19 نوفمبر القادم ان شاء الله.

وبالنسبه لمشاكل معدلات الاداء لمنصات زى Xbox Series X|S, PlayStation 5 فحتى الان مافيش شكاوى كتير من اصحاب منصات الجيل الجديد حتى الان وواضح ان المشكله دى منحصره على اجهزة الPC.

وبالنسبة لشخصيات اللعبة اللى معروفين بال specialists فلعبة Battlefield 2042 مختلفه شويه عن الاجزاء السابقة فى السلسلة لان المعتاد ان ال specialists فى العاب Battlefield بكونو زى الClasses فى العاب الRPG فيه منهم الSupport و فيه الHealer وفيه متخصص الهجوم المباشر و فيه الEngineer المتخصص فى تصليح العتاد والمركبات, بس مع Battlefield 2042 واضح جدا ان استوديو DICE قرر انه يخلى اسلوب لعب ال specialists متروك للاعب نفسه.

 لان مع الرغم من ان شخصيه بيكون ليه الPerak الخاصه بيه زى مثلا الSundance المزوده بWingsuit بيخليها متميزة فى الحركة بين الاهداف بسهوله جدا وكمان عدد 3 انواع مختلفه من القنابل الموجهه لعربات الاعداء زى الدبابات او او الطائرات, او Casper اللى عنده علم باقتراب عدو منه وحتى الاتجاه اللى جى منه, ولكن كل "متخصص" منهم ممكن يستخدم نفس الاسلحة و نفس الGear تقريبا فا مش عارف الصراحه What’s The point من وجود متخصصين فى اللعبة, مع الرغم انى شخصيا مع الوقت بقيت اجرب كل شخصيه لمجرد الاستمتاع بتجربة اللعبه وده شيى لاما هتلاقى ناس معجبه جدا بيه او ناس معتبره ان ده اكبر سلبيه فى اللعبه وماأعتقدش انك هتلاقى فئه وسطيه بينهم.

وبمناسبة الاسلحة فاعددهم حتى الان قليل شويه بالتحديد 22 سلاح وحاليا فيه 4 Assault Rifles و عدد 2 Light Machine Guns و 3 فقط من ال Marksman Rifles ( اعتقد وصلت الصورة ) وبسبب ان عدد الاسلحه مش بالعدد الخورافى, استوديو DICE عمل حاجة ممكن ماتكونش ظريفة, بأنه خلى متطلبات انك تفتح اسلحه شويه مبالغ فيها و بتاخد وقت بجد مثلا SFAR-M GL وده Assault Rifle محتاج انك توصل Level 27 قبل ما تعرف تستخدمة و سلاح NTW-50 وده Sniper Rifle محتاج تكون وصلت Level 60 قبل ما تفكر انك تشوف ده بيعمل ايه اساسا, ممكن الايجابيه اللى فى النقطه دى بالتحديد انك فعلا بتلاقى نفسك بتتعود على السلاح اللى بتلعب بيه ومع الوقت بتتعلم ايه الموقع المناسب ليك لو بتستخدم سلاح بعينه.

وفى نفس الوقت قدم DICE امكانية تعديل اضافات الاسلحة On the fly بصورة شبيهه جدا بالعاب سلسلة Crysis والغريب انى شخصيا مش مصدق ان الثنائى فى العاب الShooter اخدو كل الوقت ده او مع الاصح واحد منهم علشان الخاصيه دى تكون فى العابهم, طبعا اقصد Call Of Duty وطبعا Battlefield, وصراحتا الخاصية دى فعلا بتغير اسلوب لعبك تماما على حسب الموقف اللى انتا فيه, مثلا لو معاك Marksman Rifles فالطببعى انك تكون فعال جدا لو العدو اللى قدامك بينك وبينه مسافة ظريفه, انما فى المواجهات المباشرة بسبب Scope السلاح بيكون ديما او غالبيه الوقت على الاقل مش فى مصلحتك, بس فى Battlefield 2042 سهل جدا تغير لاسكوب مناسب للمسافات القصيرة وهكذا برضه مع سلاح زى ال SMGs اللى لاحظت ان الRecoil بتاعه اقل جدا من ال Assault Rifles واعتقد ان ده مش مقصود من مطورى اللعبه واتمنى انه يتم تعديلة فى المستقبل.

ولو كنت من بحبى المركبات ( دبابات, حوامات, هيليكوبتر, طيارات حربيه حامله جنود الخ... ) برضه اعتقد ان التحكم فيهم كان جيد لحد كبير, بس اتمنى ان DICE تعدل الاحساس بوزن المركبات شويه خاصتا طائرات الهيليكوبتر لانك حرفيا بتحس انك فى طياره ورق ملهاش وزن اطلاقا.

ومش محتاج اكيد اوصف مدى الابهار البصرى اللى فى Battlefield 2042 فى كل خريطه سواء منطقة الغابات فى خريطة زى ORBITAL او صحراء خريطة HOURGLASS, او RENEWAL اللى بتحصل فى مصر بالمناسبة, وده شيى متوقع من محرك رسومات زى Frostbite, وفى الجزء ده تمت اضافة افضل عنصر بصرى شوفته فى حياتى للعبة Shooter ( الاعاصير ) اللى مع الرغم انه مش بيحصل فى كل مباراه, بس لما بيحصل بجد بلاقى نفسى بقشعر من الابداع اللى انا شايفة, وبرضه بيكون عنصر مؤاثر جدا فى الGameplay لان مثلا لو اعصار ضرب قريب من نقاط مسيطر عليها الفريق التانى بيكون شيى مدمر جدا الصراحه وده بيخليهم يسيبو ال Post بتاعهم وبالتالى بيكونو فريسه سهله للفريق بتاعك, وطبعا العكس صحيح.

ثانيا : HAZARD ZONE

ده ممكن تتعبره extraction royal mode وده بيكون فريق من اربعة لاعبين مهمتهم انهم يلاقو Data Drives متوزعين فى الخريطة اللى ديما بتكون اصغر من الخرائط اللى بتلاقيها فى نظام  ALL-OUT WARFARE وده طبيعى نظرا لان ALL-OUT WARFARE بيستوعب 128 لاعب فى نفس الوقت.

عموما, بعد ما فريقك يستحوز على مجمل ال Data Drives المفروض ان فريقك يتوجه لاقريب نقطة extraction ولو كل حاجه مشيت تمام ( الف مبروك يا برنس فريقك كسب ) وكل فوز او خساره بتكسب IN GAME Credits بتصرفا فى انك تشترى اسلحة و Gear افضل, ونصيحه اخويه, حاول انك تكون فى بارتى على الPS5 او على شات ديسكورد مع اللى انتا بتلعب معاهم خاصتا ان اللعبة مش مدعوم فيها in game chat حتى اليوم والمفترض من تصريحات استوديو DICE ان الخاصيه دى هتكون متوفرة فى وقت لاحق.

ثالثا : PORTAL

وده ممكن نعتبره Love letter من مطورى DICE لعشاق الاجزاء الاسطوريه من سلسلة Battlefield خاصتا Battlefield™ 3, Battlefield Bad Company™ 2, and Battlefield™ 1942 واعتقد انه هيكون خلال المستقبل القريب افضل نظام للعبة Battlefield 2042 لانك فقط مع دخولك portal.battlefield.com تقدر تعمل الخريطه و اسلوب اللعب وقوانين المباراه حتى ال Classes من اى جزء من الاجزاء المزكورة فوق زى ما تحب وبيكون متوفر فى اللعبه ليك ولاى حد تانى عاوز يجرب اللى انتا صممته , وممكن نعتبر انه حاليا محتاج شويه تعديل بسبب الاستغلال الخاطى للنظام ده من بعض الاعبين لانه بيكون مكان مثالى جدا للXP points farming , وعلى فكره اعتقد انه هينظبط قريب جدا خاصتا بعد تصريحات DICE بانه هيتم تعديل امكانيه الحصول على نقاط ال XP فى PORTAL منعا لاستغلاله فى المستقبل.

بس فعلا ممكن اعتباره انه واحد من افضل اضافات سلسلة Battlefield على الاطلاق.

واخيرا, اعتقد فعلا ان كميه المحتوى المتواجد فى لعبة Battlefield 2042 يعد اكبر محتوى فى تاريخ السلسلة تم توفرة Day one حتى الان وبجد اللعبة متوفر فيها امكانيات ممكن جدا تخليها من افضل العاب الفيديو على الاطلاق وشخصيا ممكن اعتبر نفسى واحد من الناس المتشوق جدا علشان اعرف ايه اللى هيتم اضافته فى المستقبل من قبل استوديو DICE للعبة, ومع الرغم انى اخلاقيا مش بفضل انى اقولك تصرف فلوسك على اي لعبه بالتحديد لان الVideo Games هى ازواق فى المقام الاول, ولكن لعبة Battlefield 2042 واحدة من الالعاب اللى انصح بتجربتها بشدة لان فى الوقت الحالى حقا وصدقا, مافيش اى لعبة تانيه بتعرف تحسسك انك فعلا فى ساحة معركة زى السلسله دى.