في قصة إضافة Hearts of Stone للعبة The Witcher 3 كان الشرير الرئيسي هو Gaunter O'dimm، شيطان متجسد في شكل إنسان ملوش اسم حقيقي أو نسب، وملقب "بسيد المرايا"

جاونتر كان بيحاول في إضافة اللعبة يغوي Olgeird، بإنه هيخليه في عز لا يفنى وقوة هائلة وعمر لا ينتهي وكمان هيساعده يتزوج من الفتاة اللي بيحبها، في مقابل شرط واحد فقط وهو عند موت Olgeird مش هيروح للآخرة، مكانه هيكون في عالم الشيطان وبكده هيكون أنتصر في رهانه ضد البشر..

مسلسل ونوس تناول نفس الفكرة تقريباً، ونوس كان الشيطان اللي بيحاول يغوي "ياقوت" بالأموال الطائلة، في مقابل نفس الهدف، ان عند الموت هيكون تحت سيطرة ونوس، الحقيقة إن الفكرتين متأثرين برواية ألمانية أسمها "فاوست" واللي بتحكي عن شخص أستدعى الشيطان عشان يقدر يحصل على جميع ملذات الحياة، أعمال فنية لا حصر لها أتأثرت بالقصة دي وكان القاسم المشترك بينهم إن دايماً التعاون مع الشيطان بيكون مجرد وهم والأمنيات فعلاً بتتحقق ولكن حكمة الانسان أقل بكتير من انه يكون على دراية بالنتائج أو الآثار الجانبية للأمنيات دي ..

في The Witcher 3 أولغيرد بيستمتع بقوته وثروته لفترة وجيزة جداً قبل ما يكتشف إن بسبب الـ Immortality اللي أكتسبها من الشيطان، قلبه أصبح من حجر، مش قادر يشعر بأي شيء سواء حب أو كره ويكاد بيشعر بالألم، لدرجة انه أهمل زوجته تماماً اللي كان بيحلم يتزوجها وأبرم عقد مع الشيطان عشانها في الأصل، مما أدى إلى انتحارها في نهاية المطاف وقرر بعدها يستدعي الشيطان "Gaunter" تاني عشان يشيل من عليه القدرات الخارقة ويرجع فقير بس قادر يحس..

يمكن مغزى القصة متشابه في اللعبة والمسلسل، انك لازم تبقى حذر من أمنياتك، وتبقى عارف الثمن اللي هتدفعه قصاد كل أمنية بتحلم توصلها، وعبرة تانية أتقدمت بشكل مختلف - حسب معتقدات كل مؤلف - وهي إن الشيطان مش هيجي من وراه غير الهلاك، ودايماً هيبان انه صديق الانسان لكنه دايماً بيسعى لتدميره وبيبقى زي الفخ أو المصيدة اللي بيقع فيها الغفلان زي ما ونوس قال في المسلسل..

من اللمسات الفنية والاهتمام بالتفاصيل في إضافة ويتشر 3 إن Gaunter O'dimm ظهر قبل أحداث الاضافة وتحديداً في قصة اللعبة الأساسية، هو اللي بيدلك على مكان ينيفر في بداية اللعبة وكان بيظهر باستمرار في cutscenes عشوائية على انه تاجر عادي، ومش بس كده في دلائل كتير بتشير ان هو اللي لعن السيدة "مارلين" وحولها إلى تعيس مرقط في توسعة Blood and Wine ..

الحقيقة المسلسل واللعبة كانوا هايلين فعلاً، وشيء جميل إن احنا نشوف لعبة تتطرق لمناقشة مواضيع هامة وذات مغزى زي دي في صناعة ترفيهية، ويريت فعلاً شركات النشر تسيب المطوريين يبدعوا براحتهم بدون أي قيود عشان نقدر نشوف ألعاب بنفس مستوى ويتشر 3 تاني