ليه The Last of Us من أفضل القصص؟
|
حابين نتكلم عن سبب تميز قصة لعبة The Last of Us اللي ممكن نعتبرها من أفضل القصص على الإطلاق في عالم الألعاب..
نحب الأول ننوه إن المقالة هتحتوي على مناقشة بعض التفاصيل اللي تخص أحداث قصة الجزء الأول تحديداً فلو مكنتش لعبتها يفضل الامتناع عن القراءة
على عكس معظم الأعمال الفنية اللي بتقدم فكرة الزومبيز كمحرك أساسي للقصة عشان تركز على عامل الرعب أو الأكشن، لعبة The Last of Us حاولت تغير مش بس في إن المصابين بفيروس Cordyceps ليهم مسميات مختلفة وشكلهم مبتكر شوية عن الزومبيز، لكن كمان لو ركزنا على الرسائل الخفية اللي قدمتها القصة هنلاقي ان في كلام مهم محتاج يتسلط الضوء عليه..
تعالوا نستفيض الأول في بعض التفاصيل اللي تخص نشأة فكرة الزومبيز وليه بتحظى على الاهتمام الكبير ده من المؤلفين والكتاب، الفكرة بدأت في الميديا الترفيهية سنة 1968 مع فيلم Night of the Living Dead واللي يعتبر أول من رسم ملامح الشكل المودرن للزومبيز وكان مصدر إلهام لعديد من الاعمال الفنية، الفيلم رغم إن في مضمون تجربته يظهرلك السلوك الحيوانية القاسية جداً للزومبيز إلا انه قدم عنصر أهم في القصة وهو إن البشر من الممكن يكون عندهم صفات أسوأ بكتير من الزومبيز، الفيلم أعتمد على جانب الـSocial Commentary اللي ببساطة عبارة عن تكنيك بيتقدم أنواع مختلفة من الفن لعمل اسقاطات تناقش مواضيع إجتماعية أو سياسية بطريقة غير مباشرة، مع استايل فني بشكل يشبه العرض مسرحي مثلاً..
وده العنصر اللي ركزت عليه The Last of Us من خلال فلسفة Joel اللي قدر يكونها بعد المواقف اللي اتعرضلها، جول من أول ربع ساعة في أحداث القصة لحد آخرها بيتأذي فقط من البشر، اللعبة بتركز على فكرة إن البشر في عز الجائحة أو المصائب بدل ما يقفوا مع بعض بيحصل ظاهر غريبة وهي انهم بيبقوا أكثر وحشية وعدائية لبعض، موت بنت Joel مكنش مبرر تماماً، إيلي لما تاهت ولقت مأوى يحميها بمساعدة جماعة سرية، اكتشفت انهم خاطفينها وقائد الجماعة "ديفيد" حاول انه يعتدي عليها بكل مكر، تصرفات تانية كتير عليها علامات أستفهام حصلت في حين إن الزومبيز أه مؤذيين بس كانوا بيحاربوك علناً مش بغدر أو خيانة..
يمكن نهاية اللعبة نالت العديد من الانتقادات، لكنها واقعية وبروزت منطق Joel اللي مكنش سوبر هيرو جاي ينقذ العالم، أه ممكن يبقى عنده صفة التضحية بس بمقدار معين ويبقى بني آدم عادي ممكن يبقى عنده دوافع حب أو كراهية، Joel لما أكتشف انه عشان يحمي البشر اللي دمروا حياته هيضطر يفقد إيلي اللي كان بيعتبرها تعويض لبنته اللي ماتت، قرر انه يرفض رفض شديد اللهجة ويمنع جماعة الـFireflies من انهم يصنعوا المصل وهرب بيها، لأن لا البشر بالنسباله يستاهلوا التضحية دي، وكان شايف إن إيلي صغيرة وساذجة على انها تاخد قرار زي ده..
تميز قصة The Last of Us كان فعلاً استثنائي وقليل لما بنلاقي استغلال زي ده في تقديم ألعاب من نفس النوع، عشان كده هتفضل واحدة من الكلاسيكيات التي لا تنسى
|
