ليه HellBlade مزعجة!
معظم الألعاب دايماً بتحاول تجملك في صورة البطل وتلاقي تصرفاته إلى حد كبير مُلهمة، انما عمرك لعبت لعبة بتحاول تنفرك من البطل قدر الإمكان؟لعبة Hellblade بالفعل كان ده هدفها، ورغم انك لو قولت لأي حد هتلعب لعبة بتناقش الأمراض النفسية، أول حاجة هتخطر على باله إن البطل هيكون شخص كيوت ويصعب عليك ويخليك تحبه، خليني أقولك إن ده لو حصل اللعبة هتبقى ناجحة درامياً، بس هتبقى فاشلة في انها توصلك الصورة الحقيقية
اللي عملته Hellblade هو ببساطة نقل الواقع كاملاً بدون أي تجميل أو Sugar Coating زي ما بيقولوا، وعشان تقدر تحقق المعادلة دي كان لازم تكرهك في البطل في شكله وتصرفاته وده اللي أتقدم من خلال Senua اللي شغالة صياح وصريخ طول الوقت بشكل مزعج ودايماً خايفة تواجه وتعبيرات وشها غريبة تخليك تنفر منها وحتى ضعفها بيبان بصورة هجومية لدرجة انك بتبقى مش قادر تتعاطف معاها
الهدف من كل ده اختبار الصبر عندك من خلال استفزازك بتصرفات Senua لحد ما تنسى انها أصلاً مريضة بالذهان أو الpsychosis وتبتدي تنتقدها مثلاً، عشان تيجي اللعبة هنا وتقولك بص، هو ده بالظبط رد فعل المجتمع مع اللي بيعانوا من أمراض نفسية في الحقيقة بمختلف أنواعها، لأن تصرفاتهم بتبقى مش مثيرة للتعاطف وبيكرهوا الناس فيهم وللأسف محدش عارف إن ده بيحصل غصب عنهم
اللعبة كمان بتكسر الجدار الرابع بإمتياز، وبتخاطب اللاعب مباشرةً من خلال الشخصية التانية لـSenua - الأكثر اتزاناً - وبتقدر تعرف منها الخلفية الدرامية ليها واللي حصلها في الماضي من أبوها واضطهاد من المجتمع بشكل عام اللي كان بيعتبر وقتها الأمراض النفسية عبارة عن لعنة من الGods ولازم يبتعدوا عن الشخص الملعون ده لحد ما يتم التخلص منه!
وده اللي بيحصل في الواقع بس بصورة مختلفة لأن مجتمعات كتير بالفعل بتتعامل مع الأمراض دي بشكل خاطىء وكان هدف اللعبة انها تكون تجربة تعرفك فعلاً ايه اللي بيمر بيه مريض الPsychosis والخيالات اللي بيشوفها وأفعاله الغريبة عشان كده Senua كان لازم تبقى مزعجة لتوصيل المعنى
نختم كلامنا بلفتة جميلة من مطور اللعبة Ninja Theory اللي أعتمد بشكل كبير في الحملة الدعائية للعبة على دعم الأشخاص اللي بيعانوا من الأمراض دي وفي يوم الصحة النفسية العالمي تحديداً في 10 أكتوبر 2017 تبرع المطور بكل أرباح اللعبة لمؤسسة Rethink Mental Illness
|
