انا جاي أثير الجدل وأقولك لو نطقت كلمة حشاشين بس غيرت حرف الـ ح لـ A وال ش لـ S بما إن الحرفين دول ملهومش مثيل في الانجلش، هتلاقي الكلمة اتحولت لـ Assassin ..

دي مش صدفة لأن كلمة Assassin بالفعل مشتقة من حشاشين، وبرغم غرابة الكلمة وان احنا مشوفناش في أي جزء دليل على المسمى ده - حتى اتسيو أصيع أساسين مكنش بيدخن أصلاً - بس لو رجعنا لأصل الكلمة وسبب التسمية هنفهم الموضوع..

 

 

ببساطة كان في جماعة بالفعل اسمهم الحشاشين، ظهروا في عصر الدولة الفاطمية وأسسها شخص اسمه "الحسن بن الصباح" وبالمناسبة ده اللي يفترض هنعرف قصته مع مسلسل كريم عبد العزيز الجديد.

الحسن أسس الجماعة بهدف تنظيم اغتيالات سياسية ومؤامرات، زي ما بنشوف بالظبط في أجزاء Assassin's Creed استراتيجيتهم العسكرية دايماً هي القتـ*ل بأسلوب التخفي مش في العلن وكانوا بينفذوها بالخناجر والسم بردو زي الألعاب.

 

 

الحسن بن الصباح كان هدفه تكوين مرتزقة عندهم مهارة في فنون القتال والأهم يكون عندهم ولاء لدرجة عالية جداً حتى لو كان الثمن انهم يعرضوا أرواحهم لمخاطر، وعشان يقدر يحقق المعادلة دي كان بيخليهم يعتقدوا إن تنفيذ أوامره هيخليهم يدخلوا الجنة، وخصص جزء من قلعته اللي سماها "آلموت" عشان تبقى مكان شبه الجنة من حيث الحدائق الجميلة والأشجار والفواكه وبعدكده يحطلهم في الأكل نبات القنب الهندي المعروف باسم الحشيش عشان يكونوا مغيبين وتحت تأثيره ولما يدخلوا المكان ده بيفتكروه جنة بالفعل، ومن هنا تم تسمية الجماعة دي بالحشاشين.

جميع الاستراتيجيات العسكرية اللي أستخدمها الحسن بن صباح مع جماعته كانت بتتميز بالبراعة والدهاء ولسة بتدرس حتى يومنا هذا، وقدر يرهب أوروبا والشرق خلال فترة العصور الوسطى، ولكن على عكس معظم أجزاء Assassin's Creed اللي بتحاول توصل فكرة إن الطائفة دي غرضها نبيل أو بتعادي الـTemplars لمنع الاستعباد حتى لو الحل هو الفوضى، إلا انهم في الواقع تاريخهم عكس كده تماماً وكانوا مش مفيدين غير لنفسهم فقط ويمكن ده اللي حاولت توضحه لعبة Assassin's Creed Rogue.

اللعبة كانت المفروض تنتهي بعد الجزء الأول لأن الحقبة دي كانت بداية ونهاية طائفة الحشاشين، ولكن بسبب نجاحها التجاري ولأنها في الأصل مكنتش مهتمة بالدقة التاريخية، أستمرت لبعدكده وفي فترات زمنية مختلفة تماماً، ولكن الجزء الجديد Assassin's Creed Mirage قدامه فرصة انه يرجع للأصل ويعرفنا تفاصيل حقيقية عن الجماعة دي بما ان أحداثه هتكون في فترة قريبة من القرن الـ11-13 ميلادي اللي ظهرت فيها الحشاشين بالفعل.