زي ما بتقول المقولة الشهيرة دائماً Every Villain is the Hero of His Own Story اللي ممكن يكون تفسيرها بيوصلنا لنظريات كتير و لكن من المؤكد إن فيه قاسم مشترك ما بين النظريات دي كلها و هي أهمية دور الشرير (الvillain)  في القصة و قد ايه ممكن قوة قصة معينة تتوقف على قيمة الvillain نفسه في أي عمل فني ترفيهي سواء لعبة أو فيلم أو مسلسل .. و لكن طبعاً هنخصص كلامنا عن الألعاب و تعالوا نرجع للماضي و نتذكر أكتر villains قدروا إنهم يأثروا فينا و يسيبوا إنطباعات مختلفة عند كل واحد اللي منا كرهه واللي منا كان بيفضله عن بطل اللعبة نفسه!

 

5- Vaas (Far Cry 3)

 

 

طبعاً كتير منكم أكيد توقع وجوده في الtop 5 و خلينا متفقين إن مفيش فينا حد لعب 3 Far Cry و ميعرفش شخصية vaas حتى اللي ملعبش اللعبة أكيد سمع عنه و هو بالطبع كان له أهمية كبيرة في أحداث القصة و كان بيضيف قيمة كبيرة للعبة لإنه فعلاً من أكتر الشخصيات اللي قدرت تثير إنتباهنا كلاعبين .. و ده بيرجع لعوامل كتير منها إسلوبه المثير في الحوارات اللي كان بيطغي عليه طابع الblack comedia بنسبة كبيرة ده غير أفعاله الجنونية الغير متوقعة اللي بتفكرنا بشخصية زي الجوكر في عالم باتمان و بالإضافة طبعاً للأداء التمثيلي العظيم للمثل Michael Mando في دور الشخصية .. تحفظي الوحيد على شخصية Vaas هو ندرة ظهوره في اللعبة تقريباً مظهرش غير في المناسبات الكبيرة و للأسف اللعبة مدتهوش المساحة الكافية لإنه مكنش الmain villain الرئيسي في اللعبة

 

4- Zeus (God of War II & III) 

 

 

سلسلة God of War مفيش شك إنها واحدة من أفضل السلاسل اللي نزلت في ال10 سنين اللي فاتوا و بالتأكيد سبب من أسباب النجاح الكبير اللي حققته السلسلة هو الجزء التاني اللي غير إتجاها تماماً من إنتقام من إله حرب واحد فقط لقصة صراع مع ألهة الolympus كلهم و اللي خلى من الجزء التاني أحداث حافلة بالمشاهد الملحمية و كان zeus الmain villain واحد من أهم أسبابها .

زيوس المعروف في الميثولوجية اليونانية بإله السماء كان بيمتاز ديماً بالحكمة في كلامه و أفعاله و اللعبة بتستعرض الشخصية بدور الanti-hero (متعارض مع أفكار البطل فقط وليس شرير) و لكن فيما بعد أو بعد الربع الأولاني من القصة بتكتشف إنه الvillain .. شخصية zeus كانت ممتازة في كل حاجة كتابة و أداء تمثيلي و تصميم رسومي .. و لكن العيب اللي ممكن أشاروا ليه بعض النقاد و أوقات بتفق معاه إن الشخصية إمتدت للجزء الثالث برغم إن كريتوس كان تقريباً على وشك إنهاء قصته في الجزء الثاني

 

3- The Joker (Batman Arkham Series)

 

 

الجوكر و من أول ظهور ليه عالإطلاق في عالم باتمان و ممكن نقول بكل بساطة إنه حاجة في الDNA للعالم ده مينفعش الإستغناء عنه و ده اللي ركزت عليه بشكل كبير Rocksteady في الثلاثية الرائعة اللي قدمتهالنا اللي إبتدت باللعبة الثورية Batman Arkham Asylum و إنتهت بBatman Arkham Knight

طبعاً وجود شخصية بجنون و سادية الجوكر في أحداث قصة باتمان هو اللي كان بيعمل الbalance أو التوازن المطلوب في أي لعبة إننا منشوفش إنتصار دائم من البطل و لازم يمر بups و downs عشان أحداث القصة متاخدش رتم واحد و يبقى فيه نوع من الroller coaster و الجوكر من الناحية دي كان مأدي الدور ده بشكل عظيم و الفضل يرجع لعوامل الكتير أهمها الأداء الصوتي اللي حتى في غياب mark hamil في Arkham Origins إلا إن Troy Baker عرف يأدي الدور ببراعة شديدة

تحفظي الوحيد على شخصية الJoker هو مش في الشخصية نفسها و لكن إعتماد rocksteady بشكل أساسي عليه في الثلاثية أدى لإهمال بعض الشخصيات الvillains التانية اللي كانت من ممكن الإهتمام بيها يعلى عن كده شوية

 

2- Handsome Jack (Borderlands 2)

 

 

بالتأكيد سلسلة Borderlands واحدة من علامات الجيل السابع و اللي جه من بعدها ألعاب كتير إتأثرت بالتصميم بتاعها و لكن لما نرجع نبص للسلسلة دي و اللي قدمته في الجزء الأول هنلاقي إن كان فيه ضعف من ناحية حبكة القصة و الشخصيات و تقديمهم .. و ده اللي إختلف تماماً مع ظهور الجزء التاني بmain villain مبذول فيه مجهود كبير من ناحية الكتابة و دوره في القصة و هو Handsome Jack اللي ممكن نسميه الأب الروحي للسلسلة بشكل عام

ميزة Handsome Jack إنه مكنش villain تقليدي هو فيه أسباب مقنعة إلى حدً ما بتخليه العدو الرئيسي ليك خلال رحلتك و كمان هو واحد من الegomaniacal villains (مرض جنون العظمة) و ده كان بيخلي تصرفاته و شخصيته بشكل عام مثيرة للإنتباه ده غير علاقته الغريبة ببنته.

 

1- Nemesis (Resident Evil 3)

 

 

واحد من الfigures في صناعة الألعاب اللي كان مصدر إلهام للصناع في المجال ده هو بدون شك Nemesis العدو الرئيسي ليك في لعبة Resident Evil 3

اللي بيميز الشخصية دي و بيخليها واحدة من أفضل ما قدمت الصناعة هي إن تأثيره عليك من خلال الجيم بلاي بيعود بنتائج أكبر بكتير من الcutscenes .. التفاعلية و الinteractive هما اللي بيخلوا ألعاب الفيديو وسيلة ترفيهية مختلفة عن أي وسيلة تانية لإنك بتتفاعل مع القصة و الأحداث و هنا كان دور nemesis في لعبة رعب يعتبر well developed جداً خصوصاً إن المشاهد اللي ظهر فيها كانت كتير و اللعبة عرفت تديه حقه بشكل كافي.