أزاي لعبة Red Dead Redemption 2 قدرت تغير مفهوم ألعاب الopen world؟ المراجعة الكاملة للعبة
المراجعة طبعاً متأخرة جداً و لكن انا حبيت أتكلم بإستفاضة عموماً عن اللعبة لأي حد لسة ملعبهاش لحد دلوقتي لإن فعلاً اللعبة دي غيرت كتير من مفهوم ألعاب الopen world ... الجيل ده كان فيه ألعاب عالم مفتوح كتيرة جداً .. و شوفنا ألعاب كتير بتحاول تقولنا إنها بتدي للاعب الحرية في التنقل و في طريقة اللعب بشكل يكون immersive و واقعي .. في الفترة اللي فاتت للأسف كانت معظمها وعود فقط لأن على أرض الواقع لما بنيجي نبص للتجارب دي و نحللها بنلاقي إن تصميم الألعاب دي بيندرج تحت ما يسمى بubisoft formula و هو الchecklist في تصميم العالم من مهام جانبية و تصميم مهام أساسية متواضعة جداً و كانت في بعض الأحيان بتبعد كل البعد عن خط سير أحداث القصة في سبيل خدمة حشو و تطويل مدة اللعب
هنقل بكلامي لريد ديد و اللي كانت بردو نازلة بوعود كتيرة جداً عن قد ايه العالم بتاعها حيوي و بيتأثر بطريقة لعبك ...
من خلال تجربتي اللي دامت أكتر من 90 ساعة لعب قدرت إن انا أكون إنطباعات كتير عن اللعبة واللي هي أقدر أقول بدون شك إنها تحفة فنية و من أفضل ألعاب الجيل ده و لكن .. ده ميمنعش من وجود بعض العيوب البسيطة اللي هتكلم عنها و هي بشكل أو باخر أثرت نسبياً على التجربة
القصة
هبدأ معاكم بالقصة و اللي فيه كلام كتير عايز أقوله عن الشق ده تحديداً اللي يعتبر من أهم مميزات اللعبة .. قصة اللعبة بتدور أحداثها قبل أحداث الجزء الأول بتقريباً 10 سنين و القصة بتدور حوالين العصابة بتاعت داتش اللي كان منها جون مارستون في الجزء الأول
أحداث اللعبة بتكون prequel للجزء الأول و هنا البطل واحد من الgang اسمه أرثر مورجان .. الأحداث الحقيقة كانت بطيئة في الأول و حاجة زي كده ممكن تشكل بعض الملل للاعب خصوصاً لو ملعبش الجزء الأول و مش على دراية كاملة بالشخصيات .. و لكن في الاخر اللعبة بتاخد كل البطىء اللي كان في الأول و بتوظفه بشكل أكتر من ممتاز يخلي التفاصيل الصغيرة اللي كانت في أول اللعبة مش حاجة ينفع نتهاون بيها تماماً .. التفاصيل دي سواء في حياة داتش اللي هو شخصية معقدة تثير فضولك و كمان باقي الشخصيات اللي في العصابة اللي هما تقريباً أكتر من 15 فرد و اللعبة عرفت إنها تدي كل شخص منهم حقه ... و أخيراً أرثر .. هنا انا عايز أشيد بيه لإنه من جميع النواحي سواء الكتابة كان ممتاز أو أداء الصوتي اللي كان أكتر من رائع من جانب روجر كلارك .. و في رأيي هو تخطى بمراحل جون مارستون بطل الجزء الأول من ناحية دوافعه المثيرة جداً للإهتمام و الups و الdowns اللي كان بيتعرضلها خلال الرحلة الطويلة و قصته مع العصابة و ولائه ليهم كانت تعتبر العمود الفقري للحبكة الدرامية في اللعبة
قصة اللعبة ببساطة عرفت توفق ما بين الحبكة الدرامية اللي ممكن تطلع من أي عمل فني يخص الغرب الأمريكي في فترة زمنية زي دي و في نفس الوقت مبعدتش عن التلميحات السياسية و الإجتماعية و الفلسفية اللي ديماً روكستار بتسلط الضوء عليها في ألعابها سواء بإسلوب ساخر أو بتلميح مباشر اللي لو أي حد مهتم بالأعمال الأدبية هيكون مهتم جداً بالكلام ده زي اللي كان بيتعرف في GTA
الجيم بلاي
لعبة ريد ديد عالمها ضخم جداً مليء بالنشاطات اللي ممكن تعملها و اللعبة في نفس الوقت مش بتجبرك نهائي إنك تعملها عشان تكمل القصة بأفضلية في جانب معين .. هنا الموضوع بيرجع لحرية اللاعب اللي غالباً هيختار إنه يستكشف تفاصيل العالم الجميل ده .. النشاطات الجانبية دي بتنقسم لأشياء كتير جداً من حيث الصيد اللي هو لو فصلنا الصيد لوحده ممكن تبقى لعبة صيد بدون مبالغة من كتر ما الموضوع متشعب جداً .. اللعبة فيها أكتر من 200 نوع من الحويانات البرية و الحيوانات دي بتنقسم لفئات كتير كل فئة بتتنوع على حسب المكان و البيئة لأن اللعبة فعلاً فيها بيئات كتير مختلفة .. و الحيوانات دي بتصطادها لأغراض كتير سواء عشان تبيعها و تكسب من وراها أو عشان تعمل كرافت للأدوات اللي بتحتاجها خلال رحلتك أو تروح لأي حد تارزي يفصلك ملابس اللي على مزاجك .. أو ممكن توديها للجانج و تتبرع بالجلود و اللحم اللي بتاخده من الحيوانات دي في مقابل فوائد بتاخدها على مدى البعيد .. زي مثلاً إنك تزين الخيمة بتاعتك
الحيوانات دي كمان فيه منها النادر و ده العائد المادي بتاعها كبير جداً و كمان فايدتها أكبر في تفصيل الملابس
من ضمن فوائد التنقل في ريد ديد هي مواقفك مع الunscripted events .. اللعبة تقريباً مش هتسيبك فاضي .. انت حوالي كل 3 دقائق بتلاقي شخصيات NPCs في العالم ده بتثير فضولك ممكن جداً تقابل واحد جريح تساعده بإنك توديه المستشفى و الشخص ده هيكون فيه consequences بينك و بينه فيما بعد لو شوفته تاني .. ممكن جداً تلاقي 2 بيتشاجروا مع بعض على شيء و انت تخش تحل المشكلة دي ما بينهم .. حجات كتير من هذا القبيل مش هخوض في تفاصيلها عشان متسببش نوع من الحرق .. ميزة الموضوع ده إنه كان ممتع و بيكسر أي ملل كان ممكن يواجهك في خلال التنقل من مكان لاخر
فيه حجات تانية كتير ممكن تعملها و دي موروثة من جزور أجزاء قديمة من سلسلة GTA و هي إنك مثلاً تروح تحلق أو تروح تتفرج على عرض في مسرح أو تعمل باونتي هانتينج و تاخد مقابلها فلوس .. و لكن بجانب النشاطات المزدحمة دي فيه حاجة مينفعش إني أنسى أذكرها و هي مهمات الstrangers .. دي بالنسبة ليا انا شخصياً كانت فاكهة المهام الجانبية اللي كان فيها أفكار كتير و إخراج عظيم لقصص المهام دي ميقلش عن قوة تقديم المهام الأساسية و فيه مهام منهم هتعلق معاك جداً
الأصوات
اللعبة فيها كمية soundtracks كتيرة جداً الحقيقة اللي تلحينها كان لايق جداً على أجواء الwestren و كانت بتناسب أجواء و طبيعة المهمات المختلفة من كوميدية لدرامية لأجواء ملحمية .. من ضمن الsoundtracks دي موسيقى outlaws from the west اللي في رأيي توقيتها في أول مهمة عبقري و خلاني شخصياً أعيد المهمة دي أكتر من تلت مرات عشان أستمتع بتوقيت الساوندتراك ده مع أول طلقة بتحس فعلاً إن اللعبة بتاخدك لعالم تاني عالم الجريمة و القتل العالم الدارك اللي كنت بعيد عنه تماماً و في هدوء تام قبل اللحظة دي .. اللحظة اللي نقلت الدراما للأكشن و الموسيقى العظيمة اللي خدمت عليها
اللعبة بردو إهتمت جداً بأصوات البيئة المحيطة أصوات الحيوانات البرية واقعية جداً نفس الكلام بالنسبة لأصوات تفاعلك مع البيئة لما بتخبط في شجر أو زرع و صوت صهيل الحصان اللي كان واقعي و أتموسفيريك لأبعد الحدود
بالنسبة للأداء الصوتي اللعبة إحتفظت بالمؤديين الصوتيين اللي كانوا موجودين في الجزء الأول زي روب ويثوف مؤدي صوت جون مارستون أو بينيامين بيرون ديفيس و ناس جديدة زي روجر كلارك اللي قام بدور أرثر مورجان .. عموماً جميع الممثلين حتى اللي قاموا بتمثيل الشخصيات الجانبية كان أدائهم أكتر من هايل خصوصاً بينيامين و روجر كلارك الحقيقة أبسط حاجة ممكن أقولها إنهم أبدعوا في أدائهم التمثيلي
الرسوميات
الحقيقة مش عارف أبدأ منين .. الإتجاه الفني اللي كان في غاية الروعة ولا مستوى الإضائة ولا تفاصيل الأماكن .. اللعبة عرفت تقدم تفاصيل دقيقة للغاية في بيئة الغرب الأمريكي و بتوصفها بشكل عميق جداً و البيئة المحيطة بتخليك تشعر فعلاً بإنك سافرت بألة زمن و رجعت للعصر ده! بدون مبالغة الإهتمام بالتفاصيل كان بيبتدي بالtextures العظيمة للبيوت الصغيرة و الخيام و طريقة إنتشارها في قرى زي bayou أو strawberry أو valentine و مدن كبيرة بتختلف تماماً عن اللي ذكرتهم من ناحية إن البيوت عبارة عن عمارات ضخمة و كلامي هنا عن مدينة زي saint denis .. الموضوع ده كان بيخليك تحس بحيوية المدن و إختلافها عن بعض ده بجانب الNPCs و تفاعلهم معاك .. فا بشكل عام تصميم العالم الحقيقة في اللعبة دي كان في منتهى الجمال
كنت الصراحة متخوف من مستوى ريد ديد التقني و تقلها عالأجهزة خصوصاً إن انا ليا تاريخ مش قد كده مع تجارب زي GTA IV اللي كانت بتعاني جداً من ال Pixelated Edges
لكن الحقيقة ريد ديد كانت بتمتاز بتنعيم الحواف في الحركة و الanimations كانت ناعمة و سلسلة و لكن ده ميمنعش إن المستوى ده كان بينزل في بعض الأماكان زي Saint Denis اللي الفريمات فيها كانت مستواها بتنزل من 30 ل20 و يمكن أقل
لكن على الجانب الاخر حاجة زي الFacial Animation في اللعبة كان في منتهى المرونة و الحيوية و بيخلي حركة و تعابير الوشوش واقعية و بتنقلك الإحساس المطلوب
عيوب اللعبة
اللعبة الحقيقة على رغم إنها بتقدم تجربة مميزة جداً و لكن كان فيها بعض العيوب اللي لابد من ذكرها :
- تصميم المهام الأساسية ريد ديد من الألعاب اللي تعتبر واخد نفس قالب الجزء الأول و GTA في تصميم المهام الأساسية اللي للأسف فيها عيب كبير .. على قد ما التجارب دي كانت بتيح للاعب حرية كبيرة في التجول في العالم ده كانت مقيدة جداً في المهام الأساسية من ناحية طريق تنفيزك للمهمات كان بيبقى نفس النمط و مش بيمر بتغييرات كتير .. ديماً بتبتدي برحلة بالحصان مع المرافق اللي معاك في المهمة و بتواجهه مشكلة بعد وقت مش هين من الحديث ما بينكم و المشكلة دي بعدها بيحصل gun fight واللعبة بتتحول لcover shooter إعتيادية زي مثلاً max payne .. على الرغم إن قوة القصة كانت بتخلي عيب زي ده مش ملموس أوي و لكن ده يظل عيب مؤثر لازم روكستار تاخد بالها منه في ألعابها القادمة
-الحركة الغير مريحة .. للأسف زي السطر اللي فوق حركة البطل في اللعبة كانت شبيهة جداً بحركة GTA V الحركة في إتجاه ثابت بدون ما ياخد أي زاوية اللي بتخلي فيه تقل و صعوبة شديدة أثناء تدوير الكاميرا لإنها بتاخد زاويا أكبر .. حاجة زي كده مع تقل الanimations كانت في أوقات بتخلي الgun fights مملة
- الDead Eye .. ديماً بختلف مع معظم الأراء اللي بتقول إن اللعبة فيها واقعية مفرطة .. لإن الdead eye اللي بعتبره من أكبر عيوب اللعبة كان بيخليني ألجأ في اوقات كتير لrambo-style الغير واقعي تماماً و ماخدش أي cover و ألاقي المواجهات سهلة جداً .. الdead eye بيبطىء الزمن بيخليك تقدر تنشن بسهولة و تجيب headshots و هو عبارة عن bar بتقدر تملئها للاخرعن طريق وسائل سهلة و بسيطة و بتحصل عليها بسهولة ده بيخلي الdead eye شيء معاك باستمرار بالتالي مواجهات سهلة جداً
ريد ديد تعتبر من أفضل الألعاب اللي لعبتها الجيل الحالي من أفضل التجارب اللي مرت عليا طول حياتي بشكل عام و إستمتعت جداً بال90 ساعة اللي قضتهم محستش إني أهدرت وقت بل بالعكس انا يمكن لسة مكتفتش من محتوى الend game العظيم في اللعبة
التقييم النهائي :
Gameplay : 9.2/10
Story : 10/10
Soundtrack : 10/10
Graphics : 10/10
Overall : 9.8/10
