تقرير: أهم إصدارات شهر مارس

هنقدملكم في الفقرة دي أفضل الألعاب القادمة للأسواق في شهر مارس .. و هنكرر الفقرة في كل شهر من شهور السنة .. مارس ديماً بيكون شهر قوي في الإصدارات بتاعته خصوصاً إنه بيمثل نهاية لسنه المالية فا كل شركة بترغب بإنهائها بأفضل صورة ممكنة 

عشان كده ديماً بنحصل على إصدارات قوية جداً في الشهر ده .. و منقدرش ننسى طبعاً إن السنة اللي فاتت نزلت God of War صاحبة جائزة أفضل لعبة في السنة GOTY

السنة دي .. و بعد فبراير اللي كان بردو شهر مليء بالإصدارات .. واضح إن مارس هيكون شهر قوي بالنسبة للألعاب الفيديو .. فا يلا بينا ناخد جولة سريعة عن أهم الألعاب اللي هتنزل في الشهر ده  :

1 مارس 6 Dead or Alive

Xbox One, PS4, PC

سلسلة ألعاب القتال الشهيرة من نشر شركة Koei Techmo وتطوير فريق Team Ninja بترجلعنا من جديد مع الإصدار السادس من السلسلة .. واللعبة نازلة بوعود كتيرة مع تغييرات كتير الحقيقة في الcore gameplay اللي ممكن تغير توجه السلسلة لمسار تاني خالص .. اللعبة هتركز بشكل أكبر على إسلوب اللعبة و هتوفر فيه خصائص كتير اللي ممكن تخلي لاعب يعرف يستخدمها مع الممارسة زي سلسلة Mortal Kombat .. الجدير بالذكر إن اللعبة لحد جزئها الرابع كان حصرية للxbox 360 و إتفكت حصريتها بعدكده إبتدائاً من الجزء الخامس .. الجزء السادس كان من المفترض ينزل الشهر الحالي و لكن تم تأجيله لشهر مارس. 

6 مارس Left Alive

PS4, PC

شركة Squar Enix بتقدملنا لعبة مختلفة و IP (عنوان) جديد هينزل في شهر مارس  .. بتدور الأحداث فيها بنفس عالم سلسلة ألعاب الإستراتيجي و الRPG لعبة Front Mission ..  و ممكن نعتبرها sequel و لكن هنا هتكون لعبة تصويب و أكشن و بعض عوامل التخفي Stealth .. الحقيقة معتدناش على ألعاب من الجنرا أو النوعية دي من الشركة اليابانية Square Enix فا الحقيقة انا منتظر جداً اللعبة هتطلع أزاي خصوصاً إن المصمم الشهير Yoji Shinkawa هو اللي أشتغل على ألعاب زي سلسلة ميتال جير في جانب تصميم الشخصيات .. هو نفسه اللي هيقوم بتصميم شخصيات لعبة Left Alive و هيكون عن الArt Direction حتى هنلاحظ شبه كبير من شكل الشخصية اللي على غطاء اللعبة من شكل شخصيات سلسلة Metal Gear Solid .. يوم السادس من شهر مارس الحالي هو موعدنا مع صدور اللعبة.

8 مارس 5 Devil May Cry 

Xbox One, PS4, PC

بعد طول إنتظار أخيراً بنحصل على جزء جديد من سلسلة ألعاب الhack and slash الشهيرة Devil May Cry من تطوير و نشر الشركة اليابانية Capcom .. الجزء ده تحديداً بيحمل معاه الكثير من التوقعات اللي أغلبها إنها هتكون لعبة بأفكار جديدة خصوصاً إن الديمو كان مستواه ممتاز فا بنتمنى إن اللعبة تكون عند حسن ظننا .. الجدير بالذكر إن اخر جزء من السلسلة كان DMC: Devil May Cry اللي محققش نجاح كبير و كان محاولة لتقديم ريبوت غربي للسلسلة و لكن لم يلقى الكثير من الترحيب لجماهير و عشاق السلسلة.

اللعبة المرة دي هتخلينا نقدر نلعب بثلاث شخصيات Dante بطل السلسلة الأول و Nero و الشخصية الجديدة V .. اللعبة فيها كل المقومات اللي تخليها واحدة من أفضل إصدارات العام الحالي و لكن منستعجلش و نحكم قبل ما نشوف ..

15 مارس Tom Clancy's The Division 

Xbox One, PS4, PC

من الألعاب اللي ممكن نكون منتظرينها جداً و لكن بحذر هي لعبة “The Division 2” من شركة Ubisoft .. الجزء الأول قدملنا تجربة لعبة جماعيه Coop على الشبكة بشكل مميز و لكن كان فيه أخطاء كتير في التصميم و بعض المشاكل الأخرى اللي بتخص محتوى اللعبة بجانب القصة و تقديمها المتواضع برغم وجود lore ضخم جداً .. مع الجزء الثاني اللي هينزل للعبة في 15 من مارس بيحمل معاه الكتير من التغييرات .. قصة اللعبة هتدور أحداثها بعد شهور قليلة من نهاية أحداث الجزء الأول وهنا أصبح البشر على دراية أكبر بكيفية التعامل مع الفيروس و القضاء عليه ..

الجزء ده هنشوف فيه تنوع في البيئات و الموضوع مش هيتوقف على البيئة الثلجيه فقط زي الجزء الأول .. اللعبة بشكل عام واحدة من أضخم إصدارات السنة بدون شك و ممكن إنها تنافس على ألقاب كتير.

22 مارس Sekiro: Shadows Die Twice

PS4, Xbox One, PC

وصلنا لأهم إصدار شهر مارس على الإطلاق .. اللي ممكن نعتبرها ببساطة أهم إصدارات السنة و هي لعبة Sekiro: Shadows Die Twice اللي هتكون العنوان الجديد من فريق التطوير From Software اللي أشتغل على سلسلة ألعاب الإسطورية Dark Souls .. إنتظارنا للعبة دي مش بس عشان هي من تطوير فريق From SW و لكن اللعبة بتمثل زي تحدي كبير للفريق بالكامل إنهم يعملوا لعبة بأفكار مختلفة فهل هيقدموها بنفس مستوى سلسلة دارك سولز أو bloodborne؟ ده اللي هنعرفه في يوم 22 من مارس الحالي.

الجدير بالذكر إن قصة اللعبة هتدور أحداثها في عهد الساموراي الياباني و ده نفس العهد اللي هيكون فيه حصرية سوني لعبة Ghost of Tsushima اللي من المفترض إنها هتنزل السنادي بردو.