ألعاب الطور الفردي زي Uncharted مبقتش تهم الناشرين!
الكاتبة و المخرجة الأمريكية Amy Hennig اللي تعتبر واحدة من أهم الأسماء اللي شاركت في تطوير ثلاثية Uncharted على منصة الPS3 و إشتغلت بردو لفترة مش هينة على لعبة Uncharted 4 قبل ما تسيب إستديو Naughty Dog للإنضمام لشركة EA .. برغم إنها ساهمت بشكل بكير في تطور ألعاب الطور الفردي إلا إنها شايفة حالياً إن النوع ده من الألعاب مبقاش يشكل أهمية كبيرة للناشرين زي الأول.
Amy Hennig أشارت في لقاء صحفي عن سلسلة Uncharted وتحديداً عن الجزء الأول اللي بتأكد إن اللعبة لو صدرت في الوقت الحالي مكنتش هتقدر تحقق النجاحات الكتير اللي حققتها لما صدرت في عام 2007 .. و أشارت إن كون إن لعبة بتخلص في 8 ساعات و مفيش أي أطوار إضافية أو أطوار لعب مختلفة أو مالتي بلاير فكرة مش مستحبة للناشرين حالياً.
أضافت الكاتبة إن القدرة على خوض الأحداث من جديد واستخدام شفرات الغش و إكتشاف أشياء مختلفة في اللعبة كان من ضمن عوامل نجاح Uncharted و لكن مش ده التوجه الحالي اللي بتعتمد عليه الصناعة حالياً و الألعاب اللي بتقدم محتويات ضخمة وعدد ساعات لعب طويلة و أطوار لعب جماعية وخدمات حية Live Service ومنافسات Battle Royale هو ده اللي بتركز عليه أغلب شركات النشر حالياً عشان ترضي التوجه العام.
