أعلنت نينتندو عن استلامها عدد ضخم من الطلبات المسبقة لجهازها الجديد Switch 2 في اليابان. الطلب كان فوق كل التوقعات، لدرجة إن الشركة اضطرت تستخدم نظام يانصيب عشان تقدر تتعامل مع حجم الإقبال.

شركة نينتندو وضحت إن الأولوية كانت للعملاء اللي لعبوا بشكل نشط على السويتش الأول، أو اشتروا اشتراكات أونلاين، عشان يحاولوا يوزعوا الأجهزة بشكل عادل. ورئيس الشركة شونتارو فوروكاوا أعلن عبر منصة X إن عدد المشاركين في يانصيب البيع وصل لحوالي 2.2 مليون طلب داخل اليابان بس! رقم ضخم جدًا وفاق كل حسابات نينتندو.

نينتندو اعتذرت رسميًا لكل الناس اللي مش هيلحقوا يطلع اسمهم في السحب الأول، وقالت إنها بتحاول تزود الإنتاج وتلبي الطلب الكبير مع الوقت.

الجهاز الجديد Switch 2 هيُباع بسعر 450 دولار عالميًا، وهيكون هو الخليفة الرسمي لجهاز Switch الأول اللي قعد ناجح 8 سنين متواصلة.

بس اللي شد الانتباه أكتر، إن نسخة اليابان من الجهاز هتتباع بسعر أرخص شوية حوالي 350 دولار (49,980 ين ياباني)، بس النسخة دي هتكون بلغة يابانية بس ومش هتدعم تغيير اللغة. وده بيخليها مناسبة أكتر للاعب الياباني، وصعب تتصدر للعالم بنفس السعر.

ده عمل مشكلة صغيرة وسلاح ذو حدين، لأن السعر الأرخص شجع الطلب المحلي بشكل ضخم، خصوصًا مع غلاء الأسعار والضرائب الجمركية الجديدة اللي فرضها الرئيس الأمريكي دونالد ترامب على أجهزة الألعاب.

أما عن الولايات المتحدة، فنينتندو هتفتح الطلبات المسبقة للجهاز يوم الخميس الجاي بعد ما كانت مأجلة الخطوة دي شوية علشان تحسب تأثير الرسوم الجمركية.

والطريف بقى؟ إن حتى Masahiro Sakurai، مخرج ألعاب Smash Bros الشهيرة واللي بيشتغل حاليًا على لعبة Kirby Rider لجهاز Switch 2، اضطر يدخل اليانصيب عشان يحجز الجهاز! وساكوراي بنفسه عبر عن سعادته على حسابه الرسمي لما كسب فرصة شراء الجهاز وقت الإطلاق.

واضح كده إن Switch 2 مش بس جهاز جديد… دي بداية جديدة قوية لمستقبل نينتندو.