الناس اللي بتحب ألعاب الأكشن والتكتيك استنوا كتير، ودلوقتي فيه أخبار جديدة عن جزء جديد من سلسلة Ghost Recon من شركة Ubisoft، واللي واضح إنه داخل على مرحلة جديدة تمامًا ممكن تغيّر شكل السلسلة للأبد.

حسب تقرير نشره موقع Insider Gaming واللي دايمًا بيكون أول مصدر للتسريبات، الجزء الجديد من Ghost Recon اسمه الرمزي لحد دلوقتي "Over"، والشركة شغالة عليه بقالها فترة طويلة جدًا.

التقرير بيقول إن اللعبة هتدخل مرحلة الألفا الداخلية خلال الشهور الجاية، وده معناه إنهم قربوا يوصلوا لنقطة اختبار أولي للعبة، بس المختلف هنا إن مرحلة الألفا دي مش قصيرة… دي هتستمر حوالي سنة كاملة! وده معناه إن التوقعات كلها بتشير إن اللعبة هتنزل بشكل رسمي في خريف 2026.

الناس اللي متابعه أخبار يوبي سوفت، أكيد فاكرين لما الشركة أعلنت وقف تطوير لعبة Ghost Recon Breakpoint في سنة 2022، ومن وقتها مافيش أي جزء جديد نزل. بس اللي ماكنش الناس تعرفه، إن الشركة بدأت فعليًا إعادة بناء السلسلة من الصفر بعد Breakpoint، عشان تحاول تعالج المشاكل اللي كانت موجودة وتقدم تجربة مختلفة وأقوى من الأول.

الملفت كمان إن يوبي سوفت حالياً بتمر بمرحلة صعبة، الشركة أعلنت قبل كده عن تأجيل مشاريع كبيرة داخلية، منها ألعاب معلن عنها وألعاب لسه متعلنش عنها، وده كله بهدف التركيز على تحسين الجودة وإعادة هيكلة الفريق. أما لما موقع IGN حاول يتواصل مع يوبي سوفت عشان ياخد رد رسمي على الأخبار دي، الشركة فضلت الصمت وقالت نصًا: "إحنا مش بنعلق على الشائعات أو التكهنات".

بس بالرغم من كده، ناس كتير شايفة إن الخطوات دي بتدل إن يوبي سوفت أخيرًا بتحاول ترجع Ghost Recon بالشكل اللي جمهورها الحقيقي كان مستنيه من زمان، خصوصًا إن السلسلة تعتبر من أشهر ألعاب الأكشن والتكتيك اللي كان ليها مكانة كبيرة عند الجيمرز. اللي زود الحماس أكتر إن اللعبة داخلة على إعادة بناء كاملة، يعني مش مجرد تطوير جزء جديد والسلام، ده في نية لإعادة تقديم السلسلة من أول وجديد، سواء في أسلوب اللعب، الجرافيك، القصة أو حتى طريقة التقديم.

ناس كتير في الكوميونيتي بتسأل، هل يوبي سوفت هتقدر ترجع Ghost Recon بقوة ولا لأ؟ خاصة بعد التجارب المتفاوتة اللي شفناها في أجزاء زي Breakpoint وWildlands. عمومًا، كل اللي نقدر نقوله دلوقتي إن فيه تحركات حقيقية داخل الشركة، والتسريبات دي مش جاية من فراغ، والكل مستني يشوف إزاي السلسلة هتتغير، وهل اللعبة الجديدة هتكون على قد التوقعات ولا هتكون خيبة أمل تانية.