ايه اللي ممكن ننتظره من Metro Exodus؟ - تحليل قصة الجزء الأول بدون حرق - Article

ايه اللي ممكن ننتظره من Metro Exodus؟ - تحليل قصة الجزء الأول بدون حرق -

ايه اللي ممكن ننتظره من Metro Exodus؟ - تحليل قصة الجزء الأول بدون حرق -

إسبوع واحد فقط بيفصلنا عن إصدار المنتظرة Metro Exodus .. و مفيش أحلى من إنك تلعب الجزئين اللي فاتوا حالياً!

بعد ما ختمت الجزء الأول Metro 2033 .. فكرنا في ايه اللي ممكن الواحد ينتظره مع الجزء الجديد .. ايه المشاكل اللي وقعت فيها الجزئين اللي فاتوا بنتمنى الجزء الجديد يتخطاها .. و الحجات اللي نفسنا الجزء الجديد يطور منها.
 
مبدأياً عشان ناس كتي يمكن يكون مش وصلالهم النقطة دي .. جزئين ميترو بيقدموا واحدة من أفضل قصص ألعاب الشوتر و البقاء اللي نزلت في الجيل السابع .. اللعبة أه قدمت عالم Post-apocalyptic مميز جداً بتفاصيل رهيبة في كل ركن بتعدي عليه .. اللعبة أه أتموسفيريك لأبعد الحدود .. اللعبة فيها جيم بلاي ميكانيكس رائع .. لكن تظل أهم ميزة بالنسبالي هي قصة العالم و إسلوب عرضها و الخلفية الدرامية اللي مبنية على قصة Artyom.
و من هنا حابب أستفيض أكتر في إن أزاي قصة Metro كان ليها قيمة كبيرة.
 

 

مبدأياً و بدون أي حرق .. اللعبة فيها نهايتين .. كما جرت العادة دايماً بنشوف نهاية Good و نهاية Bad في الألعاب اللي بتقدم نهايتين .. و لكن مع ميترو الموضوع مكنش بالسطحية دي خصوصاً مع نهاية الجزء الأول 2033 
اللعبة بتبتدي تستعرض قصة العالم و بتقولك إن كان فيه كارثة حلت في العاصمة الروسية موسكو بعد الضربة النووية و تأثيرها على العالم اللي حول الأشجار والبحار و الغابات و الأنهار و الحدائق ومعالم الحضارة كلها لأرض بلا حياة No Man's World لدرجة إن الناس بقت بتشوف المعالم الحضارية دي على هيئة صور على الحائط للتأمل و إستعادة الذكريات فقط .. السماء و لونها الأزرق أصبح شيء يفتخر بيه اللي بيشوفه خارج الMetro و يحكي لغيره عن منظرها و لونها الأزرق .. و للأسف كمان مفيش ناس كتير هتصدقه! .. الأمر تحول فيما بعد إن أبسط حقوق الإنسان اللي من المفترض أن يحصل عليها بقى شيء صعب الوصول ليه بل في بعض الأحيان مستحيل.
 
اللعبة visually بتخليك فعلاً تعيش المأساه مع سكانها في أنفاق موسكو المظلمة بشكل أفضل من الرواية لإن الفيديو جيم حاجة interactive بتتفاعل معاها و بتعيش الشخصية زي ميكون إنت مكان البطل فعلاً .
 
في رحلة بطل اللعبة Artyom هيكون فيه زي مهمة مكلف بيها .. هيقابل أرتيوم عوائق كتير جداً مثل المسوخ Mutants أو بعض الأشخاص الخارجين عن القانون Outlaws.. أو المعاناة من أجل البقاء على قيد الحياة .. لإن الحصول على الأكسجين الكافي في المنطقة الملوثة خارج الأنفاق أمر مش هيكون سهل تماماً.
قصة الجزء الأول بتنتهي بإتمامك للمهمة المطلوبة منك .. لكن السؤال هنا .. هل المهمة في حد ذاتها كانت صح؟ هل الdark ones دول فعلاً خطر بيهدد حياة البشرية؟ .. مش هقول أكتر من كده لتجنب الحرق .. و لكن اللعبة فعلاً بتسيبلك الخيار مفتوح تحدد ايه النهاية المناسبة من وجهة نظرك .. اللي عجبني جداً مع Metro إن التلميحات للنهاية الصح مكنتش من خلال الcutscenes فقط!
أي حد حاول يفتح النهاية التانية هيكون فاهم قصدي جداً .. النهاية التانية بتطلب منك بعض الrequirements اللي من ضمنها إنك تسمع على قد ما تقدر الكلام اللي بيقولوه الNPCs لبعض قبل ما تاخد قرارك الفوضوي و تقتلهم .. ما يمكن تكون ظالمهم مثلاً!
 
 
 
من ضمن الreq إنك تتجنب معارك كتير مع وحوش انت في غنى إنك تحاربهم لإنهم ببساطة كائنات من حقهم يعيشوا و مش هيئذوك بشكل أو باخر إلا لو حسوا بخطر من ناحيتك .. من ضمن الreq بردو إنك تساعد طفل بحاجة بسيطة جداً بس بتعني ليه الكثير في مكان زي الميترو
اللعبة بتوضحلك إن الvillain الحقيقي مش الوحوش اللي بتحاربها .. مش هما دول اللي بيشكلوا خطر عالأرض قد ما فيه "بشر" في حد ذاتهم هما اللي أكثر تهديداً. 
لحد هنا و هقف .. وهقول اللي بتمنى أشوفه فعلاً في لعبة Metro Exodus :
 
- قصة تكون بمستوى القصتين اللي فاتوا و تستفيض أكتر في شخصيتي أرتيوم و anna و العلاقة ما بينهم
 
- يريت artyom ميكونش شخصية صامتة لإن ده واحد من عيوب الجزئين
 
- القصة يتعرض منها جزء كبير من خلال الcollectibles لإنها فعلاً كانت بتنقلك الأجواء أكنك بتقرا رواية Metro 2034 اللي من تأليف الرائع Dmitry Glukhovsky
 
- يكون فيه جيم بلاي بمستوى الجزئين اللي فاتوا و أتمنى الshooting ميكانيكس يكون أكثر سلاسة
 
- اللعبة تكون أطول شوية .. و تكائفك عالإستكشاف بردو زي الجزئين اللي فاتوا مع إعتبار قلة الموارد عشان يكون فيه نفس القلق و الخوف لإنها لعبة survival من المقام الأول
 
- و أخيراً القصة .. أتمنى فعلاً النهاية التانية تكون بنفس الأفكار بس تاخد وقت أكبر في العرض عشان يكون ليها تأثير أكبر
 
ده كل اللي انا منتظره من لعبة زي Metro Exodus اللي عندي عشم كبير الحقيقة إنها تفوق توقعاتي كمان و أتمنى إنها تكون واحدة من أفضل ألعاب السنة لإنها حقيقي بتملك كل المقومات و الmaterials اللازمة.